O pasado sabado 12 de xullo, celebrouse no Salón de Actos da Escola Politécnica Superior de Enxeñería da Universidade de Santiago de Compostela (Campus de Lugo) o acto académico de entrega de diplomas ò alumnado egresado ó título de Grao en Enxeñaría Civil, entre outros.
A cerimonia comezou ás 17:00 h e desenvolveuse nun ambiente cargado de emoción, lembranzas e orgullo compartido entre estudantes, profesorado, familiares e amizades. Durante o acto impuxéronse as bandas e entregáronse os diplomas ao alumnado que finalizou os seus estudos neste curso académico, nun momento simbólico que puxo en valor o esforzo e a dedicación investidos durante anos de formación.
O Colexio estivo representado polo noso tesoureiro, D. José Manuel Piñeiro García, quen asistiu ao acto en nome da institución, amosando así o compromiso e apoio do Colexio ás novas promocións de enxeñeiros e enxeñeiras.
Desde o Colexio felicitamos a todas as persoas tituladas e animámolas a continuar contribuíndo ao desenvolvemento e benestar da sociedade con responsabilidade, profesionalidade e espírito de servizo.
